by: Darren Albarda
"Tiwala lang," 'yan ang kadalasang linya ng mga tao sa kanilang sarili at sa iba. Pero saan ba tayo kailangan magtiwala o kanino?
Hindi maubos-ubos ang mga problema at suliranin sa ating buhay. Gayundin bilang isang estudyante, walang katapusan ang mga problema at pagsubok. Minsan, hindi pa natin naaayos ang isang problema ngunit muling may darating na panibagong suliranin. Bakit nga ba nangyayari ang mga bagay na ito?
Patong-patong at walang katapusan ang problema na dumarating sa ating buhay, ngunit ang solusyon ay di mo man lamang makita. "Ayoko na!" ika nga ng iba. Kaya minsan, sa dami-dami ng problema ay naisip mo na lang na bumitaw at sumuko dahil minsa'y nakakapagod na rin. Pero huwag tayong mawalan ng ganang humanap ng solusyon at huwag tayong mawalan ng pag-asa.
Ayon sa Kawikan 3:5-6,
"Kay Yahweh ka magtiwala, buong puso at lubusan, at huwag kang mananangan sa sariling karunungan. Sa lahat ng iyong gawain Siya nga'y alalahanin, upang ika'y patnubayan sa iyong mga tatahakin."
Sinasabi na sa Diyos lamang tayo magtiwala, sumunod lang tayo sa kaniyang plano at siya ang magtuturo at gagabay sa atin upang hindi tayo maligaw sa ating tatahakin. Pinapadalhan niya tayo ng mga pagsubok, maliit man o malaki hindi upang tayo'y pahirapan bagkus upang subukin ang ating pananampalataya sa Kaniya. Mahal tayo ng Diyos kaya hinding hindi Niya tayo pababayaan.
Nasa atin ang desisyon kung susunod ba tayo sa plano ng Diyos para sa atin. Kagaya ni Jesus, hinarap niya ang plano ng Diyos para sa Kaniya kahit na ang bagay na ito ay magdudulot ng hapdi, kirot at kamatayan. Kaya tayo bilang indibidwal, magtiwala lamang tayo sa Diyos at tayo'y Kaniyang tutulungan. Magtiwala lamang.
